Məxfilik siyasəti

1Biz kimik

Infini Azərbaycan bazarı üçün toy planlaşdırma xidmətidir: nişan, xına, qız toyu, oğlan toyu, toy və bal ayı hazırlığı bir yerdə. Xidmətin operatoru və şəxsi məlumatlarınızın emalına cavabdeh olan tərəf: Infini Events, Bakı, Azərbaycan.

Bu siyasət Xidmətin hər iki hissəsinə aiddir:

• infini.events veb saytı: rəqəmsal dəvətnamələr, qonaq cavabları (RSVP), qonaq siyahısı, masa düzəni, büdcə, vendor kataloqu və vendor paneli, qonaqlara WhatsApp mesajları;
• «Infini» mobil tətbiqi: cütlüklər və vendorlar (toy xidməti göstərənlər) üçün. Cütlük və vendor hesabları iki ayrı hesab növüdür.

2Hansı məlumatları toplayırıq

Yalnız Xidməti göstərmək üçün lazım olan məlumatları toplayırıq. Onların çoxunu siz özünüz daxil edirsiniz:

• Hesab: e-poçt ünvanı, ad, profil şəkli, verdiyiniz halda telefon nömrəsi və şifrə. Şifrə yalnız heşlənmiş (geri açılmayan) şəkildə saxlanılır. Veb saytda «Google ilə daxil ol» seçsəniz, Google-dan adınızı və e-poçtunuzu alırıq.
• Toy məlumatları: tarixlər və mərasimlər, tapşırıqlar, büdcə və xərclər, qonaqlar, onların adları və telefon nömrələri, masa düzəni, dəvətnamə üçün yazdığınız mətnlər və yüklədiyiniz şəkillər.
• Qonaqların məlumatları: dəvətnaməni açan qonağın cavabı, adı, telefon nömrəsi, nəfər sayı və təbriki; qonaq albomuna yüklənən şəkillər; hədiyyə üçün edilən köçürmənin qəbzi.
• Yazışmalar: cütlük ilə vendor arasındakı mesajlar, o cümlədən şəkillər və səsli mesajlar; bəy ilə gəlinin öz aralarındakı yazışma.
• Sifarişlər və ödənişlər: vendor sifarişləri üzrə məbləğlər, ödəniş qəbzləri və təsdiqləri; veb saytda alınan dəvətnamələrin ödəniş qəbzləri. Kart ödənişlərini birbaşa qəbul etmirik və kart rekvizitlərinizi saxlamırıq.
• Vendor məlumatları: biznesin adı, kateqoriyası, telefon, WhatsApp, Instagram, ünvan, qalereya, xidmətlər və qiymətlər, təqvim və abunəlik məlumatları.
• Rəylər və şikayətlər: vendorlar haqqında yazdığınız rəylər və qaydaları pozan istifadəçilər barədə şikayətlər.
• Cihaz və istifadə məlumatları: bildiriş göndərmək üçün push-token; vendor profilinə baxış, zəng, WhatsApp və Instagram düymələrinə toxunma sayları (vendora statistika göstərmək üçün); veb saytda IP ünvanı, brauzer növü və ölkə (qiymətləri düzgün valyutada göstərmək üçün), texniki jurnal qeydləri.

3Cihaz icazələri

Mobil tətbiq məkanınızı, kontaktlar siyahınızı və reklam identifikatorunu (advertising ID) toplamır və tətbiqdə reklam yoxdur.

Tətbiq cihazınızın funksiyalarına yalnız siz həmin funksiyadan istifadə etdiyiniz anda müraciət edir:

• Kamera və foto qalereya: yalnız şəkil seçəndə və ya çəkəndə (profil şəkli, mesajdakı şəkil, ödəniş qəbzi, vendor qalereyası);
• Mikrofon: yalnız səsli mesaj yazanda;
• Bildirişlər: yeni mesajlar və vacib yeniliklər üçün, yalnız icazə versəniz.

Bu icazələri istənilən vaxt cihazınızın ayarlarından ləğv edə bilərsiniz.

4Məlumatlardan nə üçün istifadə edirik

• hesabınızı yaratmaq, sizi tanımaq və hesabınızı qorumaq;
• toy planlaşdırma alətlərini işlətmək: dəvətnamə, qonaq siyahısı, RSVP, masa düzəni, büdcə və tapşırıqlar;
• cütlüklər ilə vendorlar arasında yazışmanı, sifarişləri və ödəniş təsdiqlərini mümkün etmək;
• sizin tapşırığınızla qonaqlarınıza dəvətnamə və xatırlatmaları WhatsApp ilə göndərmək;
• push-bildirişlər və xidməti e-poçtlar göndərmək (məsələn, şifrə bərpası kodu);
• ödəniş qəbzlərini yoxlamaq və sifarişləri aktivləşdirmək;
• fırıldaqçılığın, spamın, qaydaların pozulmasının və müştərinin platformadan kənara çıxarılmasının qarşısını almaq, şikayətlərə baxmaq;
• vendorlara profil statistikası göstərmək, Xidməti təhlil edib yaxşılaşdırmaq;
• razılıq vermisinizsə, yeniliklər və təkliflər barədə məlumat göndərmək; bundan istənilən vaxt imtina edə bilərsiniz;
• qanunun tələblərini yerinə yetirmək.

Məlumatlarınızı reklam məqsədilə istifadə etmirik və heç kimə satmırıq.

5Yazışmalar və moderasiya

Cütlük ilə vendor arasındakı yazışmalara Infini administratorları baxa bilər. Bu, fırıldaqçılığın qarşısını almaq, şikayətləri araşdırmaq və vendorların müştərini platformadan kənara (telefona, WhatsApp-a) çıxarmaması qaydasına nəzarət etmək üçündür. Bəzi yoxlamalar avtomatikdir: məsələn, mesajdakı telefon nömrəsi avtomatik aşkarlanır.

Bəy ilə gəlinin öz aralarındakı şəxsi yazışmanı oxumuruq.

Ödəniş qəbzləri və qonaq albomuna yüklənən şəkillər avtomatik yoxlanıla bilər. Nəticə şübhəli olduqda qərarı insan verir.

6Hüquqi əsaslar

Məlumatlarınızı «Fərdi məlumatlar haqqında» Azərbaycan Respublikasının Qanununa uyğun olaraq aşağıdakı əsaslarla emal edirik:

• müqavilənin icrası: hesabınızı və seçdiyiniz xidmətləri təqdim etmək üçün;
• razılıq: məsələn, push-bildirişlər, marketinq mesajları, kamera və mikrofona giriş; razılığınızı istənilən vaxt geri götürə bilərsiniz;
• qanuni maraq: Xidmətin təhlükəsizliyi, fırıldaqçılığa qarşı mübarizə, moderasiya və Xidmətin təkmilləşdirilməsi;
• qanuni öhdəlik: mühasibat və vergi tələbləri, dövlət orqanlarının qanuni sorğuları.

7Qonaqların və uşaqların məlumatları

Qonaq siyahısına əlavə etdiyiniz adları və telefon nömrələrini bizə siz ötürürsünüz. Onlardan yalnız sizin tapşırığınızla istifadə edirik: dəvətnamə və xatırlatma göndərmək, cavabları toplamaq və masa düzənini qurmaq üçün. Qonaqlarınıza öz adımızdan reklam göndərmirik.

Qonaqların məlumatlarını əlavə edərkən onların buna etiraz etmədiyinə əmin olun. Qonaq öz məlumatlarının silinməsini istəyirsə, cütlüyə və ya birbaşa bizə müraciət edə bilər.

Dəvətnamə səhifələri axtarış sistemlərində göstərilmir və yalnız linki olanlar tərəfindən açılır. Uşaq ad günü dəvətnaməsində uşağın adını, yaşını və şəklini valideyn və ya qəyyum daxil edir.

Infini hesabları 18 yaşdan yuxarı şəxslər üçündür. 16 yaşından kiçik uşaqlardan bilərəkdən şəxsi məlumat toplamırıq. Belə məlumatın bizə çatdığını bilsəniz, info@infini.events ünvanına yazın və biz onu silək.

8Məlumatları kimlə paylaşırıq

Məlumatlarınızı yalnız aşağıdakı hallarda və lazım olan həcmdə paylaşırıq:

• Digər istifadəçilər: vendora yazdığınız mesaj, sifariş və rəy həmin vendora görünür; vendor profili və rəylər tətbiqin bütün istifadəçilərinə görünür; dəvətnamə linki olan hər kəs dəvətnaməni görür; toya qoşduğunuz partnyor toyun məlumatlarını görür.
• Resend: e-poçtların göndərilməsi (məsələn, şifrə bərpası kodu).
• Expo, Apple Push Notification service və Google Firebase Cloud Messaging: mobil bildirişlərin çatdırılması.
• WhatsApp göndərmə xidməti (WasenderAPI) və Meta-nın WhatsApp platforması: qonaqlarınıza sizin tapşırığınızla mesaj göndərmək üçün. Öz WhatsApp nömrənizi qoşsanız, mesajlar sizin hesabınızdan gedir.
• OpenAI: ödəniş və hədiyyə qəbzlərinin oxunması, qonaq şəkillərinin yoxlanması və dəvətnamə köməkçisi. OpenAI-ın API şərtlərinə görə ötürülən məlumatlar onun modellərini öyrətmək üçün istifadə olunmur.
• Cloudflare: saytın sürətli çatdırılması və hücumlardan qorunması.
• Microsoft Clarity: veb saytda istifadə analitikası (bax: «Kukilər və analitika»).
• Google: yalnız veb saytda «Google ilə daxil ol» seçdiyiniz halda.
• OpenStreetMap və Photon: məkan axtarışı və dəvətnamədəki xəritə; bu xidmətlərə yalnız axtarılan ünvan ötürülür.
• Hostinq və fayl saxlama provayderləri: məlumatların və yüklənən faylların saxlanması.
• Dövlət orqanları: yalnız qanunla tələb olunduqda.
• Biznesin ötürülməsi: Infini birləşmə, satış və ya yenidən təşkil nəticəsində başqa şirkətə keçərsə, məlumatlar bu siyasətin şərtləri ilə birlikdə ötürülə bilər; bu barədə əvvəlcədən xəbər veririk.

Xidmət təminatçıları məlumatları yalnız bizim tapşırığımızla və bu siyasətə uyğun emal edir. Şəxsi məlumatlarınızı satmırıq və reklam şəbəkələri ilə paylaşmırıq.

9Məlumatların xaricə ötürülməsi

Xidmət təminatçılarımızın bəziləri Azərbaycandan kənarda, məsələn ABŞ-da və Avropa İttifaqında yerləşir, ona görə məlumatlarınız başqa ölkələrdə emal oluna bilər. Belə hallarda yalnız etibarlı təminatçılarla işləyir, ötürülən məlumatı lazım olan minimumla məhdudlaşdırır və onun qorunması üçün müqavilə və texniki tədbirlər görürük.

10Məlumatları nə qədər saxlayırıq

• Hesab və toy məlumatları: hesabınız aktiv olduğu müddətdə.
• Hesab silindikdən sonra: məlumatlar işlək sistemlərdən silinir; ehtiyat nüsxələrdə qalan surətlər 30 gün ərzində avtomatik təmizlənir.
• Sifariş və ödəniş qeydləri: vergi və mühasibat qanunvericiliyinin tələb etdiyi müddətdə.
• Qaydaların pozulması ilə bağlı qeydlər (xəbərdarlıqlar, bloklar, şikayətlər): təkrar pozuntunun qarşısını almaq üçün lazım olduğu müddətdə. Daimi silinmiş vendor hesabının e-poçtu və telefon nömrəsi yenidən qeydiyyatın qarşısını almaq üçün saxlanılır.
• Qoşulmuş WhatsApp nömrəsi: bağlantı toydan bir neçə gün sonra avtomatik silinir.
• Texniki jurnal qeydləri: təhlükəsizlik və nasazlıqların araşdırılması üçün lazım olan qısa müddətdə.

11Hesabın silinməsi

Hesabınızı istənilən vaxt silə bilərsiniz:

• mobil tətbiqdə: Profil → Məxfilik və təhlükəsizlik → Hesabı sil (cütlük və vendor hesabları üçün);
• veb saytda: infini.events/hesabi-sil səhifəsində;
• və ya hesabınızın e-poçtundan info@infini.events ünvanına yazaraq.

Silinənlər: hesabınız, profiliniz və profil şəkliniz, saxladığınız vendorlar, paylaşımlar və ideyalar, push-tokenlər və sessiyalar. Toyda partnyorunuz yoxdursa, toy və onun bütün məlumatları (qonaqlar, büdcə, tapşırıqlar, masa düzəni) də silinir; partnyorunuz varsa, toy onda qalır. Vendor hesabında profil, qalereya, xidmətlər və tətbiqdəki elan silinir.

Saxlanıla bilənlər: artıq göndərdiyiniz mesajlar qarşı tərəfin yazışmasında görünməyə davam edir; sifariş və ödəniş qeydləri qanunun tələb etdiyi müddətdə; qaydaların pozulması ilə bağlı qeydlər. Ehtiyat nüsxələr 30 gün ərzində təmizlənir. Hesabın silinməsini geri qaytarmaq mümkün deyil.

12Kukilər və analitika

Veb sayt zəruri kukilərdən istifadə edir: daxil olduğunuz sessiyanı və seçdiyiniz dili yadda saxlamaq üçün. Onlarsız sayt düzgün işləmir.

Saytı yaxşılaşdırmaq üçün Microsoft Clarity-dən istifadə edirik: o, kukilər vasitəsilə səhifədəki klikləri, sürüşdürməni və səhifənin görünüşünü qeydə alır. Formalara yazdığınız mətnlər gizlədilir. Kukiləri brauzerinizin ayarlarından silə və ya bloklaya bilərsiniz.

Mobil tətbiqdə üçüncü tərəf analitika və izləmə alətləri yoxdur.

13Təhlükəsizlik

Məlumatlar şifrələnmiş bağlantı (HTTPS) ilə ötürülür, şifrələr heşlənmiş şəkildə saxlanılır, qəbzlər kimi şəxsi fayllar yalnız müddətli, imzalı linklə açılır, idarəetmə panelinə giriş məhdudlaşdırılıb.

İnternetdə heç bir sistem tam təhlükəsiz deyil. Məlumat sızması baş verərsə, qanunun tələb etdiyi qaydada sizə və müvafiq orqanlara məlumat verəcəyik.

14Hüquqlarınız

Qanunla müəyyən edilmiş qaydada sizin hüququnuz var:

• məlumatlarınızın emal olunub-olunmadığını öyrənmək və onların surətini almaq;
• səhv məlumatların düzəldilməsini tələb etmək;
• məlumatlarınızın silinməsini tələb etmək;
• verdiyiniz razılığı geri götürmək və marketinq mesajlarından imtina etmək;
• müəyyən emala etiraz etmək və ya onun məhdudlaşdırılmasını tələb etmək;
• məlumatlarınızı ümumi istifadə olunan formatda almaq;
• Azərbaycan Respublikasının səlahiyyətli dövlət orqanına şikayət etmək.

Məlumatların çoxunu tətbiqdə və saytda özünüz dəyişə və silə bilərsiniz. Digər sorğular üçün info@infini.events ünvanına yazın. Kimliyinizi təsdiqləmək üçün sorğunu hesabınızın e-poçtundan göndərməyinizi xahiş edə bilərik. Sorğulara 30 gün ərzində cavab veririk.

15Siyasətdə dəyişikliklər

Bu siyasəti vaxtaşırı yeniləyə bilərik. Yeni versiya bu səhifədə «Son yenilənmə» tarixi ilə dərc olunur. Əhəmiyyətli dəyişikliklər barədə tətbiqdə, saytda və ya e-poçtla əvvəlcədən xəbər veririk.

16Əlaqə

Bu siyasət və şəxsi məlumatlarınız barədə suallar üçün:

• E-poçt: info@infini.events
• WhatsApp: +994 10 526 72 54
• Infini Events, Bakı, Azərbaycan